mustafeldur

In ricordo di mio padre

A'speranza



Ogne semmane faccio 'na schedina,
mm' 'a levo 'a vocca chella ciento lire,
e corro quanno è 'o sabbato a mmatina
'o totocalcio pe mm' 'a ji' a ghiuca'.
Cuccato quanno è 'a notte, dinto 'o lietto,
faccio castiello 'e n'aria a centenare;
piglio 'a schedina 'a dinto 'a culennetta,
'avoto, 'a giro, e mm' 'a torn' 'a stipa'.
Io campo bbuono tutta 'na semmana,
sultanto 'o lluneri' stongo abbacchiato,
ma 'o sabbato cu 'a ciento lire mmano
io torno n'ata vota a gghi' a ghiuca'.
Nun piglie niente, 'o ssaccio .. e che mme mporta?
Io campo sulamente cu 'a speranza:
Cu chi mm'aggia piglia' si chesta è 'a sciorta,
chisto è 'o destino mio... che nce aggia fa'?
'A quanno aggio truvato stu sistema
io songo milionario tutto ll'anno.
'A ggente mme po' ddi': Ma tu si' scemo?
Ma allora tu nun ghiuoche pe' piglia'?
Si avesse gia' pigliato 'e meliune
a st'ora 'e mo starrie gia' disperato.
Invece io sto cu 'a capa dinto 'a luna,
tengo sempe 'a speranza d' 'e ppiglia'.



Antonio De Curtis ( Toto')